L’Ayuntamientu de Siero abre un espediente internu dempués de la dimisión del xefe de Policia Local

Un informe alvierte d’irregularidaes nes hores estraordinaries de los axentes 

Anque yá había sospeches de posibles irregularidaes, aceleróse too con un informe de la interventora municipal qu’alertaba del númberu d’hores estraodrinaries. Namái nos meses de xunetu y agostu los axentes pasaron 2.088 hores estra con un costu de 50.000 euros. 

El llunes pasáu, l’alcalde y el secretariu municipal solicitaron los cuadrantes de trabayu pero fueron refugaos. Cuando se decataron de que desapaecieren tomaron la decisión d’abrir un espediente internu a los responsables de facelos, un primer pasu pa depurar responsabilidaes.

Dende va unos díes, los 51 axentes de la Policía Local tán obligaos a fichar nel so trabayu pa tener datos reales de la so xornada llaboral, tienen que vistir l’uniforme reglamentariu y la so ubicación conoceráse siempres gracies a los GPS que s’instalaron nos coches patrulla.

Amás, esta selmana pesllaron les dependencias de la Policia Local en Llugones pa centralizalo too en La Pola (Siero).

La noticia llega un día dempués de la dimisión del xefe de la Policía, que llevaba nel cargu dende 2006.
 
Mientres, l’Ayuntamientu yá busca un nuevu xefe de Policía y un inspector d’esperiencia afitada pa dirixir el cuerpu.