Guardáu ente la vexetación xabaz, productu de sieglos d’abandonu, asítiase’l Castiellu de Tudela. Una construcción que’l rei Alfonso III mandó llevantar nel añu 860 pa protexer la entrada a Uviéu dende la Meseta.
El rei Juan I mandó esbarrumbalu nel sieglu XIV como una forma d’acabar coles rebeliones de siguío escontra la Corona qu’entamaben ente les sos paredes. La ruina y l’abandonu fueron vezos dende entós.
L’edificiu, comíu por una trupa viesca, caltiénse entá entera, con tres círculos concéntricos de fosos y muries de cuatro metros, arrodiando la Torre Mayor, de 10 metros d’altura, la única que destaca ente’l paisaxe. A pesar de la so decadencia física, el castiellu convirtióse nun símbolu pal valle de Tudela y la parroquia de Lluniego.
Declaráu 'Bien d’Interés Cultural' dende 1965, el 'castiellu' busca agora una segunda oportunidá. Foi oxetu de delles investigaciones arqueolóxiques, estudios y prospecciones xeolóxiques. Dende va 10 años hai un proyectu pa la so puesta en valir.
Un proyectu que yá se presentó a la Dirección de Patrimoniu del Principáu d’Asturies y que tien como oxetivu sedría recuperar y facer visitable una de les fortificaciones, xunto col Castiellu de Gauzón, más bultables que se caltienen n’Asturies de la Alta Edá Media.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL