El Conseyu de la Mocedá llanza una campaña sobre los xuegos d’azar

Campaña destinada a persones ente 18 y 30 años

El Conseyu de la Mocedá del Principáu d’Asturies punxo en marcha una campaña informativa pa dar a conocer a la población d’ente 18 y 30 años la realidá de los xuegos d’azar más allá de la publicidá de les empreses de xuegu online y deportives.

La campaña "Tu ganes" ta formada por tres vídeos qu’analicen les lloteríes, les apuestes deportives y los xuegos de casinu pa dar la conclusión que la base ta en que "la banca siempre gana", asina como d’un últimu videu que busca esclariar conceptos y desmitificar otros como’l de la suerte.

El protagonista de la campaña, el llangreanu Alberto Coto, siete veces campeón del mundu de cálculu y dos veces campeón olímpicu de cálculu con 14 récor Guinness, esplica la so esperiencia nes aules cuando da una conferencia sobre cálculu mental y ve un interés nel xuegu y les apuestes que medra.