El Principáu allóñase del plantegamientu del Executivu de Sánchez sobre la puya eléctrica

Lastra critica la "asimetría" na situación de les autopistes de peaxe

El Gobiernu asturianu amosó esta mañana la so disconformidá con dos actuaciones del Gobiernu central. Per un llau’l plantegamientu que fizo l’executivu de Sánchez sobre la puya eléctrica que se celebra estos díes y per otru sobre’l peaxe d'El Güerna.

El Gobiernu asturianu alvirtió güei que la medría futura de la economía española nun pue volver a depender "del pruyimientu inmobiliariu, el turismu y los servicios" y reclamó midíes pa potenciar el desendolcu de la industria.

El so voceru, Guillermo Martínez, fizo esta alvertencia dempués d’amosar la decepción del Executivu pola puya d’interrumpibilidá -el mecanismu que compensa a les empreses dispuestes a interrumpir el so consumu eléctricu en casu de necesidá pal sistema-, qu’entamó’l llunes y acabará’l vienres.

Nesa puya, recordó, ufiertáronse precios más baxos y menos bloques de 40 megavatios, los más "apetecibles" pa la industria electrointensiva qu’opera n’Asturies como l’aluminera Alcoa, que caltién la so decisión de zarrar les sos plantes n’Avilés y A Coruña, o la multinacional siderúrxica ArcelorMittal.

D’esta forma, apuntó, el resultáu previsible de la puya sedrá "peor" pa les empreses del sector qu’operen n’Asturies y xenera "incertidumes" sobre la continuidá de la so actividá.

A xuiciu de so, l’Executivu que preside Javier Fernández, España necesita un Pactu pola Enerxía y d’una política industrial que resulta "necesaria pa España y imprescindible p’Asturies" porque un encarecimientu del preciu de la electricidá por una transición enerxética "acelerada" provocaría una nueva reconversión.

A pesar de considerar positiva la puesta en marcha en seis meses d’un estatutu propiu pa la industria electrointensiva que dexe crear redes zarraes con costos mínimos pa eses empreses, Martínez recordó que, nel casu d’Alcoa, la compañía caltién l’ERE d’estinción pa los sos 686 trabayadores d’Avilés y A Coruña.

Asina, insistió, en que nes conversaciones cola multinacional de los Estaos Xuníos ta intentando que camude la so decisión o que, polo menos, facilite la venta de dambes plantes mientres que nel casu d’ArcelorMittal recordó que se ve afectada tanto pola política arancelaria d’EEXX como poles importaciones de China.

El Principáu, solliñó Martínez, lleva años alvirtiendo de les consecuencies d’encarecer el preciu de la electricidá si s’afronta una transición enerxética "acelerada" y insistió en qu’Asturies ye una de les poques comunidaes autónomes que cumple l’oxetivu 2020 de la Xunión Europea de que la industria tenga una presencia de más del 20% nel PIB nacional o rexonal.

Per parte de so, el conseyeru d’Infraestructures, Fernando Lastra, alvirtió güei de la "gran asimetría" que ta xenerando la situación de les autopistes de peaxe dempués de que’l Gobiernu diere anuncia d’una rebaxa del 30% nes rescataes pol Estáu y una xuba del 1,67% n’otres como l’AP-66, principal vía de comunicación ente Asturies y Lleón.

No que cinca a l’AP-66, Lastra consideró positivamente que s’abra un alderique "xeneral" sobre la situación de los peaxes qu’acaben en 2018 –que’l Gobiernu yá decidió llevantar- y los qu’acaben en 2021, como’l d'El Güerna, porque esa yera la fecha hasta la que de mano taba aprobada la concesión.