El Principáu afirma que’l 'campanu' "nun pue ser más qu’asturianu"

Calvo: "La nuestra cultura nun nos la va arrebatar naide y nun nos dexemos llevar por titulares"

El conseyeru de Desendolcu Rural, Alejandro Calvo, señaló esti martes que’l "campanu", el primer exemplar de salmón que se garra nos ríos d’Asturies y qu’algama dempués un altu preciu na so puya, "nun pue ser más qu’asturianu".

Según Calvo, el fechu de qu’enantes de que s’abra la temporada n’Asturies se garren exemplares d’esa especie n’otres cuenques o n’otres comunidaes autónomes "nun tien por qué significar" que se quite a Asturies la hexemonía nesta tradición, que recibe’l nome del repique de campanes qu’acompañaba a la pesca del primer salmón de la temporada.

"La nuestra cultura nun nos la va arrebatar naide y nun nos dexemos llevar por titulares", señaló’l conseyeru nel plenu de la Xunta Xeneral na so rempuesta a una entruga del diputáu del PP Javier Brea na que planteaba la posibilidá d’adelantar la fecha d’entamu de la temporada prevista pal 12 d’abril.