El Principáu nun tien conocencia de que l’Estatutu Electrointensivu vaya aprobase nel Conseyu de Ministros

Enagora falten dalgunos informes preceptivos

El Principáu nun tien conocencia oficial de que l’Estatutu de Consumidores Electrointensivos vaya aprobase nel conseyu de ministros d’esti vienres, tal y como se pensaba.

Según pudo saber TPA Noticies, enagora falten dalgunos informes preceptivos ensin los que nun se pue dar lluz verde, enantes de les elecciones, a esti testu qu’afecta a industries como Alcoa o ArcelorMittal.

El conseyeru de Trabayu, Industria y Turismu, Isaac Pola, aseguró que’l gobiernu asturianu nun tien "rempuesta oficial".

El Principáu, al igual qu’empreses, sindicatos y dalgunos partíos políticos, presentó alegaciones al borrador del Estatutu por consideralu manifiestamente insuficiente.

L’oxetivu del documentu ye algamar un preciu competitivu de la enerxía pa la industria electrointensiva y evitar más casos como’l d’Alcoa.

Esti martes, la candidata socialista al Congresu por Asturies, Adriana Lastra, insistía nos micrófonos de TPA na intención de que l’Estatutu s’apruebe enantes de les elecciones.

Lo qu’esperen dende compañíes como ArcelorMittal ye que, polo menos, s’abra la convocatoria d’ayudes pa compensar los costos indirectos por emisiones de CO2. Unos costos que tamién afecten a la competitividá de les electrointensives y que se multiplicaron por tres nel últimu añu.