El Principáu revisará’l sistema de dependencia pa una mayor axilidá

Supondrá una reordenación del personal y les sos funciones y l’apertura de fórmules de collaboración

La Conseyería de Derechos Sociales y Bienestar camudará’l procedimientu que regula’l sistema de dependencia na comunidá p’axilizalu y facelu más eficiente, lo que conllevará una reordenación del personal y les sos funciones y l’apertura de fórmules de collaboración "estables" con entidaes locales.

Nuna comparecencia na comisión de la Xunta Xeneral, la conseyera d’esti departamentu, Melania Álvarez, esplicó qu’esti procedimientu nun sufrió nengún cambéu dende que se diseñó y reguló en 2007, poro, resulta "imprescindible’l so cambéu p’afitar tolo qu’esperimentó con éxitu nel presente exerciciu".

"De mou que l’accesu al sistema puea ser más áxil, eficiente y sobre manera, directu, evitando les duplicidaes que se dan anguaño y inxertando les nueves tecnoloxíes", apuntó.