El Serida participa nun proyectu de meyora xenética de la llegume n'Europa

Buscarán variedaes de fréxola y d'arbeyu que resistan meyor el cambéu climáticu

L’equipu de Xenética Vexetal del Serviciu Rexonal d’Investigación y Desendolcu Agroalimentariu, Serida, participa nel proyectu européu Legume Generation, qu’arrancará’l viniente 1 de setiembre y que busca impulsar la meyora xenética de la llegume col envís d’algamar nueves variedaes más productives, con resistencies a plagues y enfermedaes, y adaptaes a los múltiples desafíos orixinaos pol cambéu climáticu.

L’equipu asturianu trabayará con dos especies: la fréxola (fabes) y l’arbeyu.

La iniciativa ta financiada con siete millones pol programa Horizon de la Xunión Europea y tendrá una duración de cuatro años y mediu.

Un consorciu d’investigación lideráu pol doctor Lars-Gernot Otto, de la IPK d’Alemaña, y nel que participen 32 equipos de 18 países, desendolcará’l trabayu, que se centrará en seis lleguminoses importantes pa l’alimentación humana y animal, como soya, fréxola, arbeyu, llenteya, altramuz y trébol.

L’investigador Juan José Ferreira, responsable del equipu de Xenética Vexetal del Serida, aseguró qu’esta participación ye una "bona noticia qu’afita al equipu a nivel internacional".