El Tribunal de Cuentes perdona a Rexach y Rato del sobrecostu d’El Musel

La sentencia afita que nun hai abonos inxustificaos nin beneficiu industrial

El Tribunal de Cuentes perdonó al ex-presidente de l’Autoridá Portuaria de Xixón, Fernando Menéndez Rexach, y al ex-director xeneral, José Luis Díaz Rato, del reintegru de los 135 millones que l’Abogacía del Estáu y la Fiscalía reclamaben polos sobrecostos nes obres d’ampliación del cai d’El Musel, en Xixón.

L‘Abogacía del Estáu formuló la demanda’l 4 d’abril de 2018 y, un mes dempués, la Fiscalía pidió que los dos ex-directivos afrontaran como responsables contables directos y solidarios d’un algame nos fondos públicos de l’Autoridá Portuaria de Xixón que cuantificó en 135,3 millones d’euros.

El xuiciu celebróse’l pasáu mesde setiembre y el Tribunal de Cuentes dictó esti vienres la sentencia onde considera que les cantidaes satisfeches a la Xunión Temporal d’Empreses (XTE) Dique Torres, axudicataria de la obra, nun pasen los precios previstos nel proyectu camudáu.

En consecuencia, nun aprecia que s’afondare nun estrozu a los fondos públicos de l’Autoridá Portuaria de Xixón por razón de facese pagos en cuantía superior al importe que s’afitó, según el contratu d’axudicación de la obra del proyectu camudáu.