L'aumentu adulces de los contaxos refléxense nes hospitalizaciones n'Asturies

TPA entra na planta COVID del HUCA

L'aumentu de los contaxos de COVID-19 refléxense nos hospitales con una medría adulces d'ingresos.

Son 52 los hospitalizaos n'Asturies según l'últimu parte, 31 d'ellos nel Hospital Universitariu Central d'Asturies, na única planta COVID habilitada nesi equipamientu. La media d'edá de los pacientes baxó a 50-60 años.

Un equipu d'Asturies Selmanal entró na planta COVID nel hospital de referencia d'Asturies.​

Cola seguridá que da la esperiencia, los sanitarios ponen l'EPI pa entamar a trabayar, mientres un equipu d'Asturies Selmanal sigue los sos pasos y llega a la parte d'habitaciones.

Na planta 7A, la primera que s'habilitó nel HUCA p'atender a pacientes con COVID-19 nesta segunda fola de la enfermedá recuperaron la separtación en circuitos de puerco y llimpio y los protocolos de trabayu venceyaos con ello.

Rutines que dexaron de ser necesaries a principios de branu, cuando per más de dos selmanes toles plantes d'esti hospital tuvieron llibres de pacientes COVID-19.

Enrique Carlos Brandi Siso y José Antonio Mas González, pacientes, reciben col ánimu de quien dexó atrás lo peor y aseguren que l'ánimu ye perimportante pa salir d'esto.

Los sanitarios, pela so parte, xueguen agora cola esperiencia de lo deprendío na primer fola, anque entá ye muncho más lo que se desconoz.

Asturies Selmanal estrena temporada buscando respuestes a les duldes que sigue plantegando la COVID.