El bulevar de Santuyano d’Uviéu tresformaráse en tres fases

Beneficiará directamente a los cerca de 30.000 persones que viven na contornada

L’equipu de gobiernu del Ayuntamientu d’Uviéu (PSOE, Somos y IX) pidió güei a PP y Ciudadanos asumir el proyectu de "Imaxina un bulevar", que dexará tresformar la ciudá dende la entrada pela autopista "Y", pa tratar de llegar a un alcuerdu y a la unidá de tola corporación.

Esti proyectu, que güei foi presentáu, beneficiará directamente a los cerca de 30.000 persones que viven na contornada asina como indirectamente a tola ciudá, según l’equipu de gobiernu.

Los conceyales Ana Rivas (PSOE), Ignacio del Páramo (Somos) y Iván Álvarez (IX) pidieron a los representantes de la oposición que "deslliguen" los tiempos preelectorales d’anguaño y s’amiesten cola so participación a un proyectu que va beneficiar a los uvieínos y abandonen el "frente del non, pa dicir sí en beneficiu de tola ciudá".

Ignacio del Páramo confirmó que l’equipu de gobiernu recibió’l proyectu del bulevar la selmana pasada y la oposición tendrá accesu al espediente.

Los tres ediles presentaron el proyectu güei, acompañaos de Manuel Maurín y Antonio Abúlez, dambos miembros de la plataforma "Imaxina un bulevar", qu’agrupa a los vecinos afectaos por esta actuación urbanística que tresformará dafechu la ciudá.

L’equipu de gobiernu calificó esti proyectu d’anovación del bulevar Santuyano como un "fechu históricu" que dexará convertir una autopista nun espaciu inxertador qu’amás facilitará la conexón ente barrios hasta anguaño marxinaos, nuna actuación "ambiciosa" que sedrá de futuru.

Les llinies-guíes contemplen un gran bulevar urbanu, con una viesca que dexará una franxa interior d’equipamientos y un llagu con actividaes d’ociu.

La empresa redactora definió tres grandes fases: una central y dos ales y siete ámbitos de diferenciación.

La primer fase tien un plazu d’execución, una vez qu’entamen les obres, d’ente un añu y mediu y dos años, según les estimaciones, y entamarán ente’l Palaciu de los Deportes y la rotonda de Rubín pa lo que l’Ayuntamientu cuenta con financiación económica al cargu de los Fondos Europeos de la Estratexa de Desendolcu Urbanu Caltenible (Edusi).

El conceyal d’Urbanismu y Mediu Ambiente, Ignacio del Páramo, solliñó que ye un proyectu "real" y ensin sobrecostos y qu’inxertará la rotonda de los nuevos accesos al Hospital Universitariu Central d’Asturies (HUCA), como pidía’l Principáu al ser terrenos de l’alministración autonómica, asina como tamién contempla la conexón a Cerdeño y infraestructures soterrañes.

Los miembros de la Plataforma espresaron la so satisfacción porque con esti proyectu puea acabar con "la barrera de la brecha d’incomunicación y el focu de contaminación", anque conseñaron que-yos gustaría que tamién hubiera un compromisu de financiación de l’alministración autonómica.

A la hora de definir el proyectu, Maurín y Abúlez eloxaron que, na so opinión, ye "seriu, razonable, tanxible, executable, que nun se pue considerar un caprichu y que yá ye patrimoniu de toos"