El casinu y los bingos retrasen la so apertura n’Asturies, posible dende mañana

Nun habrá nengún tipu de restricción horaria na Fase 3

Vuelve a los bares el clásicu soníu de les máquines tragaperres. Mañana actívense eses máquines na hostelería, eso sí con un protocolu de desinfección ente veceros.

La Fase 3 autoriza que’l sector del xuegu retome la so actividá. Una reapertura llendada a la metá del aforu del local. Enagora los únicos qu’abren les sos puertes son los salones del xuegu, un total de 25 n’Asturies.  

Esos salones recreativos y d’apuestes dirán reactivándose de forma gradual, nel mes de xunu. 

El casinu d’Asturies y los 6 bingos del Principáu retrasen la so apertura a xunetu . Tán adaptando instalaciones y formando al personal de sala y hostelería.

Destaquen qu’amás de los controles de temperatura a la entrada y l’usu de mazcarina, el rexistru obligatoriu de los sos veceros da mayor seguridá pal siguimientu de posibles contaxos. Ente les novedaes de la normativa, ta la hixenización de cartes y fiches del casinu, cambeos asumibles pal sector.

El sector del xuegu da trabayu a más d’un millar de persones n’Asturies. Les más encárguense de les máquines d’hostelería.

Les plantiyes de los bingos y el casinu algamen los 250 trabayadores, y dempués ta’l personal de los salones de xuegu, con daqué más de 120 profesionales. 

Nesta Fase 3 hai coses que nun podremos facer. Los toboganes y cañicones como’l restu de zones de xuegu infantiles nun podrán utilizase, solo podremos viaxar dientro d’Asturies y los viaxes d’ociu o turismu nes diferentes comunidaes nun sedrán posibles hasta’l domingu 21 de xunu, el día qu’acabarán les prórrogues del estáu d’alarma. 

Les fiestes patronales siguirán ensin verbenes y procesiones polo menos nel so formatu de davezu, y siguiremos ensin poder dar besos y abrazos menos a persones coles que convivamos. 

La distancia social tendrá que respetase inclusive na llamada nueva normalidá. Les aglomeraciones nun volverán y tampoco podremos escaecer de les mazcarines, que siguirán siendo un elementu fundamental de prevención. 

Dende mañana yá nun habrá franxes horaries, inxerta la reservada a persones mayores de 70 años. Lo único que se recomienda pa caltener el contactu social con grupos vulnerables ye estremar les midíes de seguridá y hixene.