El decanu de la Facultá de Medicina d'Uviéu asegura que si falten médicos ye porque marchen

Insiste en combatir la fuga de profesionales al empar que considera qu'hai que meyorar la so distribución

El mantra de que falten médicos ye desacertáu según el decanu de la Facultá de Medicina d’Uviéu. José Antonio Vega solliña que los hai, pero fuera. La so receta ye combatir la fuga de profesionales y meyorar la distribución de los sanitarios equí n’Asturies.

Na so opinión, los médicos y enfermeres que tenemos tienen qu’aprovechase meyor. Por exemplu, redistribuyendo places ente especialidaes.

Otru frente ye revertir la fuga de profesionales al estranxeru en busca de salarios más atractivos. Y en parte por esi éxodu José Antonio Vega nun ye partidariu de medrar nun 15% les places nes facultaes pa formar más sanitarios. Dexaría formar n’Uviéu a 23 facultativos más. Pa ello’l Ministeriu apurriría unos 350.000 euros.