El desgüeve del salmón nos calces asturianos

Un procesu que llama l'atención pola so singularidá

Dende va dellos díes, los salmones empecipiaron el desgüeve. Un procesu que llama l'atención pola so singularidá. Nel conceyu de Salas, ta unu de los pozos onde pue vese la puesta y fecundación de les güeves del salmón.

Los salmones yá remontaron el ríu. Volvieron pal desgüeve. Los machos fueron los primero en llegar. Tres ellos, les femes, que van escoyer a aquellos que tengan los meyores territorios.

Desque la fema llega hasta que se produz el desgüeve, puen pasar hores y inclusive, díes. Nesi tiempu'l machu va tar con ella espantando a los rivales y dándo-y golpes pequeños que tienen como misión estimular la puesta. Cuando s'avera'l desgüeve, la fema escava un furacu ente les piedres, por aciu de movimientos enérxicos de la cola.

Dende va pocos años, esti pozu de Salas ye unu de los escoyíos polos salmones, pola so grava menuda y la so poca fondura.

Estos díes, el Narcea baxa claro y con poca agua, lo que dexa ver el desgüeve. D'ehí, que munchos s'averen a la parte de puesta.