El doble grau de Matemátiques y Física ye la titulación con más nota de corte

Los estudiantes que llograren una plaza tendrán que formalizar la so matrícula del 15 al 26 de xunetu

El doble Grau en Matemátiques y Física, Biotecnoloxía, Medicina, Matemátiques, Odontoloxía y Enfermería Uviéu son los estudios de la Universidá d'Uviéu qu'esixen una nota de corte más alta pa poder entrar nellos el próximu cursu escolar, según recueye la llista d'almitíos en graos con llendes de places.

La clasificación varió al respective de la del pasáu añu na que la carrera que más nota esixía pa poder estudiala yera la de Medicina, siguida pol doble grau en Matemátiques y Física, Odontoloxía, Biotecnoloxía y Matemátiques.

Los estudiantes que llograren una plaza en dalguna d'estes titulaciones qu'ufierta la Universidá d'Uviéu tendrán que formalizar la so matrícula del 15 al 26 de xunetu yá que, si nun lo faen la so plaza va quedar llibre y va correr la llista d'axudicaciones.

El periodu de reclamaciones tamién va tar abiertu dende'l 15 al 26 de xunetu y tres díes depués va asoleyase la segunda llista d'almitíos y el 2 de setiembre, la tercer axudicación de places.