L’emisariu oeste de Xixón presenta estropicios estructurales

La EMA presentará un informe sobre la infraestructura

La Empresa Municipal d’Agua yá tien preparáu l’informe sobre l’estáu del emisariu oeste de Xixón, l’encargáu d’echar a la mar l’agua depurao na estación de La Reguerona, asitiada na esplanada d’Aboño.

Nel planu la infraestructura, inaugurada en 2004, va en tanxente al dique de Torres más de dos kilómetros. Nos últimos 200 metros tien instalaos dellos difusores en forma de 'T' que dilen l’agua tratao.

Na inspección submarina fecha’l pasáu mes d’agostu, afitóse que falta’l tramu final de la infraestructura, en concreto los últimos 150 metros, onde se concentren los difusores. Dellos tán estropiaos. Amás, nuna serie de tramos que sumen unos 70 metros, l’emisariu ta peláu, desapaecieron les dos capes de la escollera de protección dexando al aire’l tubu de formigón.

Les primeres hipótesis que baraxen los técnicos son que los estropicios na infraestructura podrían ser por mor de les obres de l’ampliación d’El Musel, qu’entamaron en 2005, un añu dempués de la puesta en marcha del emisariu, o del cambéu nes corrientes marines xeneraes pola construcción del dique de Torres.