El xixonés que finó por suicidiu asistíu en Suiza, esta nueche en 'Asturies Selmanal'

Fernando Cuesta denuncia la falta de regulación de la eutanasia y la insuficiente cobertura de la Llei de Dependencia

Ayeri adelantábamos en TPA Noticies el testimoniu de Fernando Cuesta. Un xixonés de 65 años, afectáu d’esclerosis llateral amiotrófica, qu’en xunu decidió finar en Suiza por suicidiu asistíu.

Na entrevista que nos concedió en mayu, denunciaba la so frustración pola falta n’España de regulación de la eutanasia, y la insuficiente cobertura de la Llei de Dependencia.

Esta nueche, a les 21:30, podrán sentir dafechu’l testimoniu fechu pol equipu de 'Asturies Selmanal'.

Fernando Cuesta taba convencíu dafechu de que nun quería siguir viviendo con esa enfermedá. Una enfermedá, denunciaba, insuficientemente asistida, amás, pola Llei de Dependencia. En Madrid, onde vivía enantes de tornar a Xixón, la situación yera incaltenible.

La propuesta d’una despenalización de la eutanasia que nun terminó d’afitase, ficiéronlu decidise por acabar cola so vida en Suiza, por suicidiu asistíu.

Una alternativa llegal, y complicada. Informes d’un psiquiatra calteniendo la so decisión nes sos plenes facultaes mentales, torna de documentos, pidimientos especiales a la compañía aérea, viaxes d’una familia residente en Madrid, Holanda y Los Estaos Xuníos.

Ye, dicen, vivir y morrer dignamente.