Los afectaos puen reclamar pela vía civil, pero la penal zárrase al finar el conductor
La familia del kamizake de Valdés pide perdón a les víctimes del accidente y ponse a disposición d’ellos pa tolo que necesiten.
En declaraciones a TPA Noticies, l’hermanu de Juan Manuel Fernández, llamenta lo que pasó y celebra que los mancaos que siguen ingresaos tean evolucionando de mou favorable.
"Quiero pidir disculpes en nome de la familia. Toi contentu porque les víctimes tán respondiendo bien y cualquier cosa que necesiten, toi pa la so entera disposición", señaló Agustín Fernández, hermanu del kamikaze.
El funeral del kamikaze sedrá esta tarde na ilesia parroquial de Muñás, en Valdés.
RTPA faló col mancáu más grave nel sucesu d’ayeri na 'Y', José Luis Vigil, que se recupera nel Hospital San Agustín. Vigil afirma que nun tuvo tiempu de reaccionar, porque’l coche del kamikaze echóse-yos enriba.
Vigil sufre múltiples fractures, nenguna afecta a órganos internos, pero posiblemente tenga que pasar per quirófanu. La so muyer tamién ta mancada.
Los mancaos puen reclamar pela vía civil, pero la vía penal zárrase al finar el kamikaze
El fallecimientu del kamikaze conlleva la estinción de cualquier responsabilidá pela vía penal, según la fiscal cimera d’Asturies.
Esther Fernández esplicó que nel casu de que los mancaos nel accidente quieran reclamar a los herederos del fináu’l pagu d’indemnizaciones, tán nel so derechu de dir a la vía civil.
El xulgáu d’instrucción númberu 4 de Xixón ye l’encargáu d’abrir la investigación, anque enagora nun recibió los atestaos del accidente.