El madrilanu que camudó la ciudá pol pueblu pa embarcase nel proyectu de la so vida

Esteban Raposo abre en Pimiango un negociu d'hostelería nel que los protagonistes son los llibros

Esteban Raposo Aguado ye un madrilanu de nacencia que dexó media vida atrás pa entamar un suañu en Pimiango: un negociu d’hostelería nel que los protagonistes son los llibros.

Fízolo dempués de navegar y percorrer bona parte del mundu, amás de dedicase a la industria farmacéutica más de dos décades.

El suañu d’esti madrilanu afincáu nel conceyu ribedense entamó va cuatro años cuando mercó una cuadra abandonada pa tresformala no qu’enagora se conoz como la Llibrería de Pimiango. Esteban cuntó cola profesionalidá de los trabayadores de la zona y cola collaboración de los sos vecinos pa sacar alantre’l proyectu de los sos suaños.

La Llibrería de Pimiango ye un espaciu tranquilu con una decoración enllena de pequeños detalles ente los que destaquen los muebles antiguos de la so familia. La barra de la taberna ta na primer planta arrodiada de llibros, mientres que na segunda hai una variada biblioteca con más de 3.000 exemplares pa tolos públicos, ente los qu’abonden los de lliteratura de viaxes.

La Llibrería de Pimiango ye, amás, un espaciu abiertu a la cultura nel qu’habrá sitiu pa les presentaciones de llibros y pa les esposiciones de pintura, fotografía o artesanía.