El muséu d’El Cuetu pide la cesión d’una parcela de l’antigua fábrica de La Vega

El carru de combate Trubia A4 foi’l primer tanque de fabricación española

El Muséu de la Guerra Civil d’El Cuetu, en Cualloto, pidirá al Ayuntamientu d’Uviéu y al Ministeriu de Defensa la cesión temporal d’una parcela en La Vega pa llevar ellí la so colección. Los sos propietarios creen que les instalaciones quedaron pequeñes p’acoyer el material venceyáu cola contienda.

El carru de combate Trubia A4 construyóse en 1927 na fábrica del pueblu uvieín que-y da nome. Foi’l primer tanque de fabricación española, del que namás se construyeron cuatro unidaes. Tuvo un papel protagonista n’Asturies na Guerra Civil.

Esta fiel réplica d’aceru a tamañu real ye la última compra del Muséu de la Guerra Civil d’El Cuetu. El carru contaba con tres ametralladores, motor alemán, 75 caballos y capacidá pa tres soldaos.

Foi una auténtica anovación militar na época y una amuesa d’importancia de la Fábrica d’Armes de Trubia na industria armamentística del país.

El carru comparte agora espaciu con otros oxetos militares nun Muséu que busca medrar. La intención de los propietarios ye acordar con Defensa y l’Ayuntamientu d’Uviéu la cesión temporal d’una parcela na Fábrica d’Armes de La Vega pa llevar la so colección, qu’inxerta dellos vehículos de guerra, munición, armes y material orixinal de la Guerra Civil.