El programa d’intercambéu de llibros de testu de Xixón ponse en marcha’l 6 de xunetu

Una ferramienta informática dexará prescindir de los "vales" en papel

El programa d’intercambéu de llibros de testu de Xixón entamará la fase de recoyida’l 6 de xunetu con cambeos nel so funcionamientu por mor de la pandemia del COVID-19, poro, fadrá falta solicitar cita previa.

La iniciativa, entamada por Estudiantes Progresistes y la Confederación Asturiana d’Asociaciones de Madres y Padres d’Alumnos (Coapa) col sofitu del Ayuntamientu de Xixón, menguará nesta edición a dos fases y acabará’l 30 de setiembre.

Pa garantizar les midíes de seguridá, esti añu los tradicionales "vales" de papel sedrán sustituyíos por una ferramienta informática que dexará rexistrar los llibros y unviar tolos datos a cada participante al so corréu electrónicu.

La primer fase entamará’l 6 dexunetu y hasta’l 31 d’esi mes procederáse a la recoyida de los llibros de testu usaos nel cursu escolar qu’acabó agora.

L’horariu d’atención a families y estudiantes sedrá de llunes a vienres de 10:00 a 14:00.

La segunda fase del programa, na que se siguirá cola recoyida de llibros y procederáse a la entrega a families y estudiantes ente’l 17 d’agostu y el 30 de setiembre. ​