El programa d'intercambiu de llibros de testu va repartir cerca de 5.000 exemplares

Les families van poder cambiar los sos vales por llibros del 19 d'agostu al 30 de setiembre

El XXI Programa d'Intercambiu de Llibros de Testu de Xixón entamáu por Estudiantes Progresistes y Coapa va apurrir 4.814 llibros de testu a partir del llunes.

Un total de 1.951 llibros van destinase a alumnos de Primaria; 2.530, a escolinos de Secundaria y 328, a estudiantes de Bachilleratu.

La primer fase del programa, correspondiente a la recoyida de llibros de testu, cuntó cola participación de 556 families y estudiantes residentes na so mayor parte en Xixón, pero tamién en conceyos como Noreña, Siero, Villaviciosa, Carreño, Uviéu, Corvera, Avilés o Llanera.

El 81,42% vien de la educación pública y el 18,58% de la educación privada o concertada y la mayoría de los participantes (28.54%) viven nel distritu sur, siguíos del Centru (21.65%) y El Llano (21,26%).

Esti primer mes donaron llibros los colexos públicos Noega y Severo Ochoa, y l'Ampa del IES Montevil, de Xixón.

La segunda fase va dar empiezu'l 19 d'agostu y va allargase hasta'l 30 de setiembre y nestes siete selmanes families y estudiantes van poder cambiar los sos vales polos llibros pal nuevu cursu escolar (2019-2020), o intercambiar directamente llibru por llibru si nun tienen vales por nun participar na 1ª Fase del Programa.