El pulpu del Occidente anova la so etiqueta de pesca sostenible

El sellu azul llevaránlu captures d'embarcaciones de Tapia, El Porto, Ortigueira, Veiga y L.luarca

El pulpu del Occidente d’Asturies anova cinco años más el so certificáu de pesca sostenible MSC. Les cofradíes artesanales agrupaes na Asociación Arpesos fueron les precursores n’algamar en 2016 la primer certificación azul MSC de pulpu a nivel mundial.

Ye la tercer pesquería española, xunto a l’anchoa y el bacaláu, n’algamar de siguío esti estándar de pesquería sostenible y respetuosa col mediuambiente.

L’anováu sellu azul llevaránlu captures d’embarcaciones de Tapia, El Porto, Ortigueira, Veiga y L.luarca. En total, 30 que formen l’Asociación Arpesos.

Cinco años dempués, MSC reconoz otra vuelta la bona xestión de la so pesquería, l’impactu mínimu que tien nel ecosistema marín y la salú qu’amuesa la población de pulpu.

Enantes de la certificación, un kilo de pulpu pagábase en rula a tres y cuatro euros; güei, ente 10 y 11.

El cupu de pulpu MSC ye de 100 tonelaes. La campaña pasada la flota nun superó les 35 captures. Les más vendíes n’establecimientos de los Estaos Xuníos con esti certificáu de calidá.

La so anovación ta condicionada a que nestos cinco años revísense les captures y meyórense los cebos.

La flota artesanal del Occidente pesca’l pulpu ente avientu y xunetu con nases. Un arte de pesca que consiste na colocación nel fondu marín una trampa de fierro con un cebu dientro.