El sabor a hidrocarburu del agua n'Avilés podría debese a un problema nuna caldera

La Policía Nacional investiga esta posibilidá, asina como otros posibles vertíos

El golor y el sabor a hidrocarburu del agua en dalgunos puntos d’Avilés, denunciáu por dellos vecinos dende’l llunes pasáu podría tener el so orixe un problema con una caldera d’un edificiu del barriu d’El Quirinal, posiblemente na cai d’El Prado.

Asina lo apuntó esti miércoles el conceyal de Servicios Urbanos, Movilidá, Mediu Ambiente y Participación d’Avilés, Pelayo García, qu’esplicó que la Policía Nacional ta investigando esta posibilidá, asina como otros posibles vertíos nesa zona de la ciudá.

Pelayo García quixo llanzar un mensaxe de tranquilidá a la ciudadanía al asegurar que l’agua pue bebese en tolos barrios de la ciudá porque “nun hai nada qu’afite qu’haya hidrocarburu nel abastecimientu”.