Webcams
Buscar
El socialista Adrián Barbón, escoyíu presidente del Principáu
El socialista Adrián Barbón, escoyíu presidente del Principáu
Ye'l novenu presidente del Principáu, cargu nel que toma'l relevu de Javier Fernández
El socialista Adrián Barbón foi escoyíu presidente del Principáu d'Asturies 50 díes dempués de celebrase les elecciones autonómiques y ensin el respaldu de los cuatro diputaos de Podemos, unos votos qu'esti llunes yá nun necesitaba pa salir escoyíu.
El secretariu xeneral de la Federación Socialista Asturiana, Adrián Barbón, convirtióse asina nel novenu presidente del Principáu, cargu nel que toma'l relevu de Javier Fernández.
El sistema asturianu establez que pa ser investíu nuna primer votación el candidatu necesita de mayoría absoluta, daqué que Barbón nun consiguió nel plenu celebráu'l pasáu vienres nel parlamentu rexonal, onde s'abstuvieron tolos partíos, sacantes el PSOE y IX.
Colos 20 diputaos socialistes y los dos de la coalición, Barbón quedó a un diputáu de la mayoría absoluta polo que'l presidente de la Cámara, el socialista Marcelino Marcos Líndez, convocó una segunda votación pa esti llunes yá que tienen que trescurrir un mínimu de 48 hores entre una y otra.
Nesta segunda ronda, a Barbón bastába-y una mayoría simple pa ser escoyíu, daqué que tenía garantizao yá que la candidata popular, Teresa Mallada, refugó optar a la Presidencia y porque nel alderique d'investidura'l Reglamentu de la Cámara asturiana torga votar a la escontra y namás contempla'l votu a favor o l'abstención.
Facebook
Twitter
LinkedIn
Whatsapp
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL