Entra a valir el nuevu protocolu de positivos n'Educación

Los padres de los alumnos que dean positivu en test d'antíxenos van tener que presentar una declaración responsable

Dende güei, los estudiantes que faigan un test d'antíxenos en casa y el resultáu seya positivu, van considerase yá contaxos. Pa ello, les sos families van tener qu'enllenar una declaración responsable, con un formulariu que yá ta disponible na web d'Educastur. Una vegada qu'enllenen esti formulariu, l'alumnu, va contabilizase como casu positivu.

Ye una de les novedaes que Salú Pública incluyó na actualización de la guía sobre notificación de casos COVID-19 y cuarentenes nos centros educativos.

Otra de les novedaes, que tamién entra güei a valir, ye que va ser Salú quien informe a los centros de los casos positivos que se rexistren ente los alumnos. A partir d'esos datos, van ser los equipos directivos quien van tener que confinar les aules.

Agora, pa confinar una clase ye necesario qu'haya polo menos cinco casos positivos confirmaos o'l 20% del alumnáu.

Énte les duldes que tán surdiendo colos nuevos cambeos, la conseyería recueye nun documentu dalgunes de les principales duldes. Ente otres, si un padre o una madre dan positivu, y el so fíu ensin vacunar, non, tien que guardar los siete díes de cuarentena, al ser un contactu estrechu.

Amás, los siete díes d'aisllamientu, empiecen a cuntar dende l'entamu de los síntomes o desque se fixera la prueba si nun tien síntomes. Nun va ser necesario, señalen, repitila pa llevantar l'aisllamientu. Solo se fai en casu de personal sanitario o sociosanitario.