Epidemiólogos y espertos en Salú Pública piden procuru na nueva desescalada

Pedro Arcos y Daniel López Acuña consideren que tendría que facese cola vacunación más avanzada

Los epidemiólogos asturianos Pedro Arcos y Daniel López Acuña sofiten les midíes aprobaes ayeri na Interterritorial de Sanidá, pero prioricen la prudencia a la hora de compaxinar la desescalada col ritmu de vacunación pa evitar una nueva crisis.

Una desescalada más lenta, progresiva y coherente ye l'apueste del epidemiólogu Pedro Arcos que ye partidariu d'aguantar les presiones polítiques y económiques y esperar un mes más p'aumentar la cobertura de la vacunación.

De la mesma opinión ye l'epidemiólogu Daniel López Acuña, miembru del comité asesor sobre esta materia del Principáu. Cree que, poles sos característiques, l'ociu nocherniegu tien que ser la última estaya n'abrir hasta tener un porcentaxe eleváu de población vacunada. Tampoco ye partidariu de la celebración d'eventos d'hasta 5.000 persones.

Dambos espertos sofiten la vacunación con Janssen de persones d'ente 40 y 50 años. Aseguren que ye una inmunización segura, aprobada pola Axencia Europea de la Melecina, que tendría que dase ensin restricción d'edaes.