Espertos calígrafos deprenden sobre la lletra oficial del antiguu Reinu d’Asturies

El 'Libro de los Testamentos' de la Catedral d’Uviéu ye la referencia d’estes xornaes

Espertos calígrafos llegaos los más d’ellos de fuera d’Asturies deprenden esti fin de selmana sobre la lletra oficial del antiguu Reinu d’Asturies; y faenlo dende’l 'Libro de los Testamentos' de la Catedral d’Uviéu, y de les enseñances que sobre él tresmiten dos profesores norteamericanos de talla internacional.

El vieyu cartulariu del sieglu XII custodiáu na Catedral d’Uviéu sirve agora de guía pa deprender sobre los misterios de la visigótica, el tipu de lletra más común na dómina del Reinu d’Asturies que presenta, nesti códice, característiques propies

Los dos profesores norteamericanos, referentes mundiales nel so campu, que dan la formación, destaquen d’ella tanto la so gran belleza como la so capacidá pa evocar lo que pasaba en tiempos remotos.

L’actividá formativa consta d’una parte teórica y otra práctica. Nesta última recurrirán a plumines metáliques, papel, tinta y colores, como lo ficieron los escribanos del Medievu.