Robláu'l pactu de concertación de 640 millones pa la reconstrucción d'Asturies

Alcuerdu estraordinariu pa una situación estraordinaria, según definen los firmantes

El Gobiernu del Principáu, la Federación Asturiana d'Empresarios (FADE) y los sindicatos UXT y CCOO roblaron esti sábadu un nuevu alcuerdu de concertación social "d'urxencia" n'Asturies por valor de 640,2 millones centráu n'impulsar la reactivación económica de la comunidá tres l'impactu de la pandemia del coronavirus.

L'alcuerdu, el novenu que se robla na hestoria autonómica y que va ser revisáu a finales de 2021, contién un total de 182 midíes que se centren en cinco exes: impulsu a la industria; midíes sanitaries, educatives y sociales; midíes llaborales, d'empléu y seguridá; reactivación empresarial y igualdá ente muyeres y homes.

“Esta ye la concertación pa encarar el gran tresformamientu del Principáu”, aseguró'l presidente d'Asturies, Adrián Barbón, na robla del pactu, onde afirmó qu'ésti va sirvir de base pa la negociación presupuestaria y pa la orientación estratéxica de los fondos europeos.

L'axilización de los procedimientos de tramitación alministrativa y concesión de llicencies, l'aprobación de tres nueves lleis (Calidá Ambiental, de Mecenalgu Cultural y Creativu, y de Turismu) y la ellaboración d'un plan de movilidá multimodal nel área central son dalgunes de les iniciatives previstes na Concertación pa la Recuperación d'Asturies (CREA).

Recueye, amás, la creación d'una Axencia de Ciencia y Innovación y la puesta en marcha d'un plan industrial y de midíes de sofitu al sector secundariu pa la so adaptación a los cambeos tecnolóxicos derivaos del procesu de transición ecolóxica y enerxética.

Ente otres novedaes, esti alcuerdu social abordó per primer vegada al traviés d'una mesa específica la inclusión de midíes pa favorecer la igualdá ente homes y muyeres y afita la creación de la figura del delegáu d'igualdá pa realizar análisis nes empreses.

Otru cambéu ye la vixencia, porque al contrario qu'anteriores pactos, que s'estendíen tola llexislatura, cREAR abarca hasta avientu de 2021, pero'l Gobiernu, los sindicatos y la patronal comprometiéronse a revisar el conteníu, aldericar nueves acciones y vixilar el cumplimientu de les yá previstes.