Fontescavadas celebra'l so patrón cola idea d'iguar la capiya enantes d'un añu

Los vecinos siguen recaldando fondos per internet pa entamar la obra

Güei ye Santu Domingu de La Calzada, día grande en Fontescavadas, nel conceyu de Bual. Un día de fiesta que podría ser asemeyáu al d'otros tantos pequeños llugares d'Asturies pero que nun lo ye. El motivu ye la campaña que dende va unes selmanes tán llevando alantre los sos vecinos pa iguar la capiya. De titularidá privada llanzáronse a la busca de dineru por aciu de la fórmula del micromecenalgu o crouwdfounding pa llograr los dalgo más de 8.000 euros necesarios pa la renovación del teyáu.

Si too sal bien la d'esti mediudía va ser la última misa que los vecinos de Fontescavadas celebren cola capiya nesti estáu. La idea de los vecinos del pueblu ye frenar el so deterioru. Con esa intención llánzase a la busca de dineru pal so arreglu y el pasáu 2 de mayu entamaron una campaña de busca de fondos per internet.

L'oxetivu ye recaldar 5.200 euros enantes del 11 de xunu y depués siguir trabayando hasta llegar a los 8.800 euros que cuesta'l total de la obra, un proyectu que va más allá de la recuperación física del edificiu.