Freijanes desendolca 'Estación Lince' en Vegapope

Yá dende pequeñu gustáben-y los animales, pero una visita nel añu 2000 a un centru de recuperación d'especies en Tarragona camudó la vida de Luis Freijanes.

Asina entamó a coyer forma'l so proyectu, 'Estación Lince', nuna finca asitiada nel pueblu cangués de Vegapope. De mano llegó Zar, un machu de lince européu, qu'agora tien ocho años, y dempués la fema, Sasha, que n'abril cumplirá dos años.

Freijanes pasa con ellos tol tiempu que pue, estudiando'l so comportamientu y tratando de deprender too sobre la especie.

Con Zar y Sasha yá adaptaos al so nuevu hábitat, el primer pasu ye algamar la cría en cautividá.

Pero l'oxetivu final sedría reinxertar la especie. L'antaño conocíu na fastera como 'llobu cerval' desapaeció va más d'un sieglu.

Enagora, el proyectu 'Estación Lince', como un centru de recuperación d'especies y nucleu zoolóxicu, nun pudo salir alantre.

Freijanes llamenta les torgues burocrátiques, pero nun se rinde y yá estudia opciones pa dar forma a la so idea, si fai falta, n'otros conceyos.