Al traviés de 11 entrevistes en llares rurales un estudiu, fechu por Funcas a comuña cola Universidá d’Uviéu, identificó 'desiertos alimentarios' n’Asturies. N’Occidente, la fastera suroriental y les zones coles que llenden los tres grandes núcleos urbanos.
Nestos llugares, onde viven sobre manera persones mayores, subsisten unes peculiaridaes d’abastecimientu. Autoconsumu, güertes y caseríes pequeñes son protagonistes del día a día.
Guadalupe Ramos Truchero, autora d’esti trabayu d’investigación, asegura que la solución pasaría por impulsar programes pa promover el comerciu como serviciu públicu. Daqué esencial pa los que viven nel mediu rural, sobre manera mayores que siguen avieyando y pierden movilidá.
Los vecinos de Santa Marina tienen que percorrer 11 km pa llegar a la tienda más cercana
En Santa Marina un pueblu de Payares, viven namás 11 vecinos.
La tienda más cercana ta a 11 km en coche, en Campumanes. P’alcontrar un supermercáu tienen que percorrer 22 km, hasta La Pola.
Pela selmana visítalos el panaderu, el fruteru, una carnicera y un tenderu con conxelaos y dellos víveres.
Acostumaos a la ñeve, aseguren qu’anque queden incomunicaos, equí en Santa Marina ye imposible pasar fame.
Casa Morán, unu de los pocos bares-tienda que resisten n’Asturies
Asitiáu al pie de la carretera d’El Ríu las Cabras, Casa Morán ye un negociu más que centenariu porque los sos oríxenes remóntense a 1876, añu nel que lu fundó la mesma familia que, delles xeneraciones dempués, sigue atendiéndolu. Sicasí’l futuru, aseguren, ye inciertu y los sos responsables nun saben qué pasará cuando ellos se xubilen.
Amás consideren qu’esti tipu de negocios, una pieza esencial dientro de les sociedaes rurales, nun tienen nengún sofitu de les alministraciones.
Nesti bar-tienda pue alcontrase de too. Da un serviciu esencial a los vecinos de los pueblos más cercanos, pero los veceros nun dexaron de menguar énte la perda de población que tienen los núcleos rurales. Poro, nun quedó otra que buscar nuevos veceros.
Tener cerca de casa un establecimientu como esti ye daqué qu’agradecen los vecinos de los pueblos de la contornada, más nes circunstancies sanitaries d’anguaño.
Agora los veceros lleguen un coche pa facer la compra o tomar un vasu vinu pero cuando abrió les sos puertes a mediaos del sieglu XIX, en Casa Morán, amás de tienda, tamién ufiertaben serviciu de tresporte de pasaxeros en dilixencia.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL