Xixón conmemora'l día de la lliberación de Mauthausen

Recuerdu a los y les 31 xixoneses recluyíos en campos nazis

Xixón conmemora güei’l día de la lliberación del campu de Mauthausen. L’actu foi nel monolitu nel que se recuerda a los y les 31 xixoneses que fueron recluyíos en campos de concentración nazis. Un día pa recordar a estes persones, pero tamién pa reivindicar que’l so sufrimientu nun caiga nel escaezu.

Un total de 31 vides, 31 histories. Ye’l casu de la d’Olvido Fanjul, una 'neña de la guerra' xixonesa prindada polos nazis na Xunión Soviética en 1942. En 1945 foi lliberada pola Cruz Roja sueca; y como les más de les víctimes d’estos campos, malapenes quixo cuntar nada d’aquelles esperiencies na so vida de dempués.

Que les voces d’estes persones nun s’apaguen y que sigan siendo exemplu de lo que nunca más pue volver a pasar, ye lo que reivindicaron les asociaciones convocantes.

Flores nel actu de güei escontra l’escaezu de los que sufrieron l’horror.