Atopen una muria de 2.000 años n'Alava, en Salas

Los trabayos fechos sacaron a la lluz el parámetru esternu d'esta estructura

El Castru d'Alava, nel conceyu de Salas, sigue amosando sorpreses. La segunda campaña d'escavaciones fecha pol Proyectu Beriso de la Fundación Valdés Salas sacó a la lluz los restos d'una muria de más de 2.000 años, en bon estáu de caltenimientu.

Los trabayos fechos sacaron a la lluz el parámetru esternu d'esta estructura. La so función yera doble: como arma defensiva y como bancal sobro'l que s'habilitaría la terraza pa la vida doméstica. Un importante descubrimientu que va informar sobro la manera de vida de los habitantes y la morfoloxía del asitiamientu.

La muria algama un altor d'un metru por cuatro d'anchu col so rellenu interior y un llargor de delles decenes, según los resclavos que s'aldovinen sobro la superficie. Na so escavación apaecieron restos de fauna y fragmentos de cerámica y otros asociaos al trabayu metalúrxicu. Too paez indicar qu'esti ye unu de los castros más importantes de la zona.

Los trabayos, que rematen esti vienres, tamién afayaron unu de los hasta ocho fosos defensivos alcontraos na fastera septentrional, la más accesible y vulnerable.

Trabayu de campu que nos próximos meses va desenvolver nos llaboratorios pa procesar los materiales atopaos y poder dibuxar con más claridá la vida na segunda edá de fierro.