Izquierda Xunida sofita al rector frente al "matonismu" de Canteli pol treslláu de Mines

IX presentó una proposición non de llei pa reprobar lo que considera un "cercu a la universidá"

Izquierda Xunida (IX) amosó esti vienres el so sofitu al rector de la Universidá d’Uviéu, Ignacio Villaverde, frente al “cercu” a la institución por parte del alcalde uvieín, Alfredo Canteli, al qu’acusó de tener un comportamientu de “ciertu matonismu” cola so actitú de “violencia verbal” pol treslláu de la Escuela de Mines a Mieres.

IX presentó una proposición non de llei pa reprobar lo que considera un “cercu a la universidá” por parte del alcalde, al que tamién reprocha que les sos declaraciones a la escontra del treslláu “paecen sofitar los insultos recibíos pol rector”.

La diputada y portavoz parllamentaria Ángela Vallina y la ex-conceyala uvieína Cristina Pontón presentaron güei en rueda de prensa esta proposición non de llei que se debatirá nel plenu viniente onde se pide al Parllamentu asturianu que se posicione refugando los comportamientos del alcalde.

IX tamién pide al Gobiernu d’Asturies que se tomen "toles midíes afayadices" pa garantizar la integridá del máximu responsable de la institución académica, asina como asegurar el "respetu a l’autonomía universitaria frente a cualquier ataque".

Vallina y Pontón reprocharon la “mala educación” de Canteli y el so comportamientu "de ciertu matonismu y cercu" hacia la institución académica, favoreciendo los ataques al rector que, na so opinión, fomenten la crispación.

“Un rector nun pue dir pela cai y ser agredíu verbalmente y cualquier día d’otra manera", esplicó.