José Andrés Blanco ye deportista y aventureru 

A los 64 años, y como terapia pa lluchar escontra les sos lesiones, sigue faciendo exerciciu caldía 

A los 64 años José Andrés Blanco, nacíu en Madrid, lleva yá cuatro décades viviendo n’Asturies onde llegó por motivos llaborales. Alcontralu vistíu con ropa de deporte ye un vezu y ye que, por más que tea xubiláu, lo de so ye facer exercicíu caldía.

Con tres victories nel descensu del Seya adaptáu, y abondos segundos puestos, Blanco foi distinguíu esti añu pola organización d’esta prueba col premiu 'Valores del Seya'.

Nin que dicir tien que más allá d’esa distinción, Blanco volverá a tomar la salida na edición viniente del descensu del Seya adaptáu col maliayu Jonás García como compañeru de canoa.

Precursor del parapente n’Asturies, nin el grave accidente que sufrió en 1994 practicando esta disciplina, alloñó a Blanco de l’actividá deportiva, más bien tolo contrario.

A la hora de facer deporte dempués d’aquel fatal accidente decantóse pol ciclismu, precisamente poles lesiones sufríes.

Nos Xuegos Paralímpicos de Sidney, nel añu 2000, algamó dos medayes en ciclismu, una de plata y otra de bronce, asina como un diploma olímpicu, un éxitu que nun imaxinaba.

Guía de monte y de barrancos tituláu, títulos qu’algamó dempués de la lesión, parte de la so particular terapia ta nel Turismu Activu que practica como hobby.

Consciente de que l’exerciciu físicu ye fundamental pa caltener a raya les lesiones, lo que José Andrés Blanco, que xubió cumes como El Kilimanjaro o L’Elbrus, tien mui claro ye que siguirá faciendo deporte mientres el cuerpu aguante.