L’Asociación de Restauradores d’España ve "inútil" y "depredador" el proyectu pal Castru Chao Samartín

ACRE asegura que ye un plan de construcción y non de restauración, y la so financiación ye "inxustificable"

El Ministeriu de Fomentu ta enagora estudiando los proyectos que podríen recibir financiación a cargu del 1% cultural. Unu d’ellos ye’l Castru Chao Samartín de Grandas de Salime.

L’Asociación de Conservadores y Restauradores d’España considera’l proyectu presentáu "un atentáu patrimonial". Asina lo treslladaron per carta al Ministeriu de Cultura, al de Fomentu y al Principáu d’Asturies. Aseguren que ye un plan de construcción y non de restauración.

Según ACRE, el mencionáu proyectu nun ye merecedor de tal financiación. Asina, coinciden cola opinión d’un informe fechu pol profesor de la Escuela Cimera de Conservación y Restauración de Bienes Culturales de Galicia, Fernando Carrera, qu’afirma que’l proyectu supón una propuesta "desfasada, inútil y depredadora".

"Nun ye una propuesta conservadora, nin no curativo nin no preventivo, más bien paez una intervención constructiva dafechu qu’ignora fases y llectures esenciales, qu’escaez el patrimoniu orixinal y el cuidáu", aseguró esta tarde a TPA Noticies el so portavoz, Fernando Carrera.

Dende ACRE afiten esa opinión y recuerden que’l Castru Chao Samartín tien la condición de Bien d’Interés Cultural (BIC) y poro, tien la máxima protección xurídica y tán dispuestos a recurrir a toles víes si fai falta pa torgar un proyectu "incorrectu" dende un puntu de vista conservador y tamién xurídicu. La financiación del mesmu sedría "inxustificable", caltienen.

Recuerden que se trata de dineru público y insisten en que’l proyectu redactáu pue llegar a contravenir criterios de la llexislación del patrimoniu cultural. "Les actuaciones propuestes nun puen estropiar", alerten.