L'alfilada, ún de los postres más conocíos de Valdés

Un dulce tradicional que gracies a les vecines entama a ponese otra vuelta de moda

Farina, zucre, güevos, sal, formientu y mantega. Son los ingredientes principales de l’alfilada, ún de los dulces más conocíos y característicos del conceyu de Valdés.

Begoña Mayo deprendió a faceles gracies a so güela. Reconoz qu’ún de los trucos ye usar bonos ingredientes y quita-yos les impureces p’algamar la so meyor calidá. L’amasáu ye’l procesu más importante.

Tamos énte un postre que s’usaba antaño pa complementar l’alimentación. Perdióse, como otres munches recetes, pero últimamente ta poniéndose de moda otra vegada.

Begoña ye cocinera nel colexu d’A Caridá, pero los fines de selmana dedícalos a facer alfilaes y percorrer mercaos d’Asturies. Pue llegar a facer más de 200 y cuando vuelve a casa vuelve coles manes vacíes.

Nesti casu l’alfilada paez que se resiste a morrer. Un dulce que gana siguidores col tiempu. Un postre pa munchos, pero que tamién la podemos usar p’almorzar o directamente pa comela a cualquier hora del día.