La Guardia Civil d'Asturies va cuntar con un dron pa vixilar les carreteres

Entrevista al teniente coronel de Tráficu Jorge Luis Correas Amor

El Sector de Tráficu de la Guardia Civil n'Asturies va cuntar con un dron fixu n'Asturies pa la vixilancia de les carreteres. Dos axentes de la Guardia Civil recibieron yá la formación necesaria pal so manexu y realizaron les hores de vuelu preceptives.

Asina lo esplicó'l teniente coronel de Tráficu d'Asturies, Jorge Luis Correas Amor, nuna entrevista concedida a TPA. El teniente coronel va encarar en nada un cambéu de destín dempués de nueve años nel Principáu.

La Guardia Civil d'Asturies ta a nada de cuntar con un dron pa vixilar les carreteres y sancionar en casu d'infracción. Correas Amor conseña que la vocación nunca ye multar sinón prevenir accidentes.

Con esti oxetivu, l'Agrupación de Tráficu d'Asturies trabaya dende fai cuasi dos años nuna campaña especial dirixida a motoristes. Na mesma carretera, infórmen-yos de les midíes de seguridá afayadices. En 2017, el 60% de los finaos en ruta n'Asturies fueron n'accidentes de moto.

El responsable del sector de Tráficu de la Guardia Civil considera que la concienciación va calando en los conductores. Anque reconoz esmolición pola cada vez mayor relación ente distracciones y accidentes. Sobre manera, les que se producen pol usu del teléfonu móvil na conducción.