La Policía busca a seis menores por afrellar violentamente a un home n'Uviéu

La víctima podría perder parte de la visión del güeyu polos puñetazos recibíos na cara

La Policía Nacional investiga l'agresión a un vecín d'Uviéu, de 53 años, que sufrió un desprendimientu de retina dempués de qu'un grupu d'unos seis menores lu arrodiarer y solmenáren-y dellos puñetazos na cara pa roba-y la cartera.

Los fechos fueron el pasáu 30 de payares, sobro les 4:30, cuando la víctima tornaba a la so casa y al llegar a la confluencia de la plaza Daoíz y Velarde, n'El Fontán, cola cai Quintana, foi arrodiada por un grupu de menores, que lu arrodiaron, informaron fontes policiales.

Según consta na denuncia, l'home, al vese “arrodiáu”, quixo fuxir, pero los menores llograron algamar y entamaron a solmena-y dellos puñetazos na cara, unu d'ellos afectó-y a un güeyu.

La violencia del ataque fixo que l'home cayera'l suelu, momentu en que los agresores robáron-y la cartera y entamaron la fuxida.

La víctima sufrió un desprendimientu de retina y, según fontes policiales, podría perder parte de la visión del güeyu yá que, nel momentu de los fechos, llevaba unes lentines qu'estropiaron la so córnea pol fuerte impactu del puñetazu recibíu.

La Policía Nacional caltién abiertes delles llinies d'investigación pa tratar d'identificar al grupu de menores al traviés del relatu de la víctima y algamar la so detención.