La Rede Uviéu Caltenible tilda de desconocimientu les palabres del alcalde defendiendo la Ronda Norte

Los colectivos aseguren que la circunvalación nun resolverá los problemes de movilidá del noroeste de la ciudá

La ventena de colectivos que formen la Rede Uviéu Caltenible entregó na delegación del Gobiernu un documentu a la escontra del proyectu de la ronda norte de la ciudá.

Aseguren que la circunvalación nun resolverá los problemes de movilidá de los barrios del noroeste. Consideren que ye una opción descartable dafechu por innecesaria, por cara y pol so impactu ambiental.

Como alternativa, proponen meyorar les conexones de la zona cola AS-II en Pando y cola autovía Uviéu-Grau en Santa Mariña de Piedramuelle.

La Rede Uviéu Caltenible atribúi al desconocimientu, les declaraciones del alcalde, Alfredo Canteli, nes qu'afirmó que la ronda norte ye'l meyor proyectu pa la ciudá.