La UCA vuelve a denunciar la prohibición de llevar comida y bébora a la Holi Party

Dende 2002 hai una normativa rexonal que regula esta cuestión

El presidente de la Unión de Consumidores d'Asturies (UCA), Dacio Alonso, denunció güei n'Avilés que la Fundación Niemeyer patrocinadora de la "Holi party" que se celebrará'l próximu día 25 d'agostu "un añu más prohíba de manera illegal entrar al recintu con comida o bébora comprao fuera".

La Unión de Consumidores, denuncia la "clara connivencia" del Ayuntamientu d'Avilés cola Fundación Niemeyer, al nun sancionar y facer cumplir la Llei d'Espectáculos Públicos del Principáu, que garantiza'l derechu del usuariu a entrar al recintu con comida o bébora si dientro se pue facelo, "eso sí a un preciu desorbitáu".

Alonso conseñó la esistencia d'una normativa rexonal vixente dende 2002 que regula esti asuntu en conciertos y actos públicos como'l previstu na plaza del Centru Oscar Niemeyer.

Aclaró qu'en toos aquellos espectáculos destinaos a axuntar públicu pa ver una representación, xera, amuesa o proyección, siempre y cuando se permita'l consumu de comida y bébora, los asistentes son llibres de compralos enantes, si lo deseen, según la normativa vixente.