La Universidá d'Uviéu crea l'Institutu de Xéneru y Diversidá

El nuevu institutu va tar dirixíu por Isabel Carrera Suárez, catedrática de Filoloxía Inglesa

La Universidá d'Uviéu punxo en marcha l'Institutu Universitariu de Xéneru y Diversidá coles mires de consolidar la esperiencia de los programes de posgráu n'estudios de xéneru de la institución académica, que va tres décades fueron pioneros n'España.

L'institutu, que foi presentáu esti miércoles nun actu presidíu pol rector, Ignacio Villaverde, busca reforzar amás los llabores d'investigación y formación llevaos alantre polos sos integrantes. El so trabayu respuende a una creciente demanda nacional y internacional por esta área de la conocencia.

El nuevu institutu va tar dirixíu por Isabel Carrera Suárez, catedrática de Filoloxía Inglesa, y cuenta nel equipu con Rosa Cid López, catedrática d'Hestoria Antigua, como subdireutora, y Carmen Alfonso García, profesora titular de Lliteratura Española, como secretaria.