La construcción apuesta pol tránsitu a la dixitalización nes sos operaciones

Les sos empreses necesiten estratexes empresariales qu’inxerten un plan de tresformación dixital total

El sector de la construcción asturiana, en cuantes a madurez dixital, ta nun nivel emerxente poro, les sos empreses necesiten estratexes empresariales qu’inxerten un plan de tresformación dixital total y l’inxerimientu de nueves tecnoloxíes.

Asina s’afita nel análisis de Tresformación Dixital del Sector de la Construcción n’Asturies que fizo la Confederación Asturiana de la Construcción, CAC–Asprocon, a comuña con CTIC Centru Tecnolóxicu.

Les árees analizaes fueron: estratexa y organización, procesos de xestión, procesos constructivos, infraestructura tecnolóxica, ciberseguridá y habilitadores dixitales.

Dempués de facer esti análisis afítase que l’área de procesos de xestión ye’l que más avance presenta en cuantes a dixitalización, mientres que les árees de procesos constructivos y habilitadores dixitales son les que presenten más campu de desendolcu.

En cuantes a les recomendaciones que se faen pa que les empreses puean meyorar nesti campu l’informe destaca la necesidá d’afitar una estratexa empresarial qu’inxerte un plan de tresformación dixital total que dexe abordar el procesu de forma exitosa.

Amás, esti plan tendrá qu’abordar toles acciones a desendolcar nes árees empresariales analizaes, asina como contemplar la implantación de tecnoloxíes habilitadores como soluciones d’Internet de les Coses, Big Data o Intelixencia Artificial.