La cría d'osu pardu rescatada en Tameza dobló'l so pesu y yá toma alimentu sólido

L'esbardu güérfanu rescatáu n'abril sigue la so recuperación en Proaza

La cría d'osu pardu güérfanu que foi rescatada'l 1 d'abril en Tameza foi treslladada a una corralada habilitada pol Principáu en Proaza, onde sigue la so recuperación hasta que puea ser reintroducida nel mediu natural.

La corralada ta dotada de sistemes de videovixilancia que dexen facer un siguimientu del animal les 24 hores, informó l'Executivu rexonal.

Un equipu de cuidadores de la Fundación Osu d'Asturies (FOA) encargóse de la so alimentación y manexu y ta en contactu permanente con técnicos de l'Alministración autonómica y especialistes nacionales y internacionales.

Una de les prioridaes ye amenorgar al mínimu'l contactu con persones pa evitar que s'avece a elles.

L'esbardu yá empezó a recibir alimentos sólidos, sigue ganando pesu, mui importante pola so curtia edá, y yá algamó los siete quilos.

L'exemplar foi alcontráu por axentes del Mediu Natural nuna patrulla de vixilancia na zona del Cubia, ente los conceyos de Tameza, Grau y Proaza, y darréu activóse'l protocolu de recuperación y asistencia veterinaria.

Tres una revisión de la zona, acordies col protocolu d'intervención con osos nel cordal Cantábricu, comprobóse que l'exemplar taba aislláu del so grupu familiar.

Los primeros cuidaos veterinarios centráronse na recoyida d'indicadores biométricos y toma d'amueses, qu'afitaron un bon estáu de salú del esbardu.

Darréu, buscóse la so reintroducción inmediata na zona de recoyida, pa lo que se dotó al exemplar d'un dispositivu de radiosiguimientu y intentóse la integración col nucleu familiar pero nun foi posible.

Foi entós cuando los servicios técnicos afitaron que la meyor fórmula pa garantizar la supervivencia de la cría yera la so recuperación funcional n'instalaciones del Principáu.

Nes primeres selmanes establecióse un dispositivu de busca, integráu por axentes del Mediu Natural, qu'intentó alcontrar a la madre, ensin resultáu.

El Gobiernu asturianu señaló que los casos de críes d'osu pardu que queden güérfanes nos sos primeros meses de vida son cada vez más frecuentes nos últimos años por cuenta de la recuperación de la especie nel cordal.

Esta situación, que respuende a distintes causes, produzse principalmente dende finales de la primavera hasta la seronda, cuando los exemplares tienen ente tres y ocho meses.

El grupu de trabayu sobre l'osu pardu punxo de manifiestu na so última xunta la escasa información disponible sobre la supervivencia d'estos esbardos na natura, polo que s'alcordó que, énte l'apaición d'esbardos, va actuase de manera proactiva na so recuperación, col envís d'apurri-yos tratamientu veterinariu si fuera necesario y encarar la so reintroducción nel mediu natural nes meyores condiciones.