Medra la llista d’espera p’algamar plaza nuna residencia del ERA

El númberu d’asturianos medró más del 50% dende marzu de 2019

El númberu d’asturianos qu’esperen plaza nuna residencia del ERA medró un 55,5% dende’l mes de marzu pasáu. Entós había en llista d’espera 1.043 persones, güei son 1.622.

L’organismu autónomu cuenta con 5.766 places. Dende esti añu quieren abrise otres 66 n’Uviéu, 30 en Tinéu y 122 en Llugones. Tamién abrirá per fases la Unidá de Convalencencia de la Residencia Mesta de Xixón.

Sobre les crítiques de los trabayadores, nuna entrevista concedida a TPA, la xerente del ERA Ana Suárez Guerra asegura que tán cumpliéndose les ratios, y qu’esta tendencia podría dir al alza por mor de la medría del nivel de dependencia de los usuarios y de la meyora de les valoraciones.

Otru asuntu pendiente ye’l de les devoluciones a herederos d’usuarios. Ana Suárez piensa qu’entá tán pendientes de pagu ente un 30 y un 40% de les cantidaes afayadices.