La mallega, una tradición ibiense que perdura nel tiempu

Fai 10 años púnxose en marcha la so fiesta demostrativa, pa recordar el llabor d'antaño

Güei la mallega solo pue vese na demostración que cada añu faen los vecinos, pero d'antiguo yera un acontecimientu. Centén y trigu yeren los cereales que tradicionalmente semen n'Ibias. Enntes de la llegada de les cosechadores, dixebrar el granu de la paya yera un trabayu duru que necesitaba de munches manes y la implicación de tol pueblu. Hasta bien avanzáu'l sieglu XX fízose de forma manual. El cereal échase nel suelu y pégase col manal, un preséu artesanal formáu por dos palos xuníos

El procesu nun acaba equí. Dempués hai que llimpiar el cereal, aventalo y peñeralo, enantes de llevalo al molín.

El llabor foi evolucionando cola llegada de les máquines, que facilitaben el trabayu. Pero nun dexó de ser un acontecimientu. La mayadora diba percorriendo los distintos pueblos y los vecinos xuntábense p'ayudar, convirtiendo la cita nuna fiesta y un día especial.

Pa que la tradición nun se pierda, fai 10 años púnxose en marcha la fiesta de La Mallega. Ente'l públicu, munchos turistes o xente que nunca viera'l procesu, pero tamién vecinos, qu'emigraron nel so día y nun quieren perdese la cita y recordar otros tiempos.

Como antaño, la mallega ye toa una fiesta, con comida popular pa tolos asistentes nel recintu ferial d'El Foxo. Una xunta alredor d'una tradición, qu'esperen que nun se pierda. Güei yá son pocos los que saben mayar de forma manual, pero confíen en que llegue'l momentu daquién tome'l relevu pa siguir cola mallega.