La pesca artesanal, el futuru del sector

El proyectu 'Cabfishman' analiza'l potencial d'esti tipu de pesca de proximidá

Un euru gastáu na compra de pescáu viniente de la pesca artesanal xenera más trabayu na economía asturiana qu’esi euru gastáu en cualquier otru productu, según un estudiu fechu pola investigadora del Institutu de Recursos Naturales y Ordenación del Territoriu de la Universidá d’Uviéu, Laura García de la Fuente.

Ye un trabayu d’ámbitu européu, el proyectu 'Cabfishman', qu’analiza’l potencial d’esti tipu de pesca de proximidá y qu’esplicó la investigadora, nuna entrevista en TPA Noticies Matinal.

El futuru de la pesca ye’l de la pesca artesanal, remata la investigadora. Una pesca de proximidá que ye mayoritaria n’Asturies.

El proyectu 'Cabfishman', nel que participó nos últimos cuatro años, valió pa conocer la riqueza que xenera nel so entornu y analizar les sos posibilidaes.

La investigación empondera otru aspectu: ye una actividá que non solo abastece d’alimentos, sinón que tien una dimensión cultural y patrimonial importante; pero qu’afronta’l retu del relevu xeneracional.​