La primer planta de reciclaxe de grandes buques entamará la so actividá en branu

Peles instalaciones d’El Musel pasarán hasta cinco cargueros al añu

N’El Musel acaben los trabayos pa poner en marcha la primer planta de reciclaxe de grandes buques d’España.

Un complexu nel que se dará una segunda vida al 98% de los componentes. Peles instalaciones pasarán hasta cinco cargueros al añu de gran tonelaxe pal so esmantelamientu. La empresa DDS Vessels espera entamar l’actividá esti mesmu branu.

Namái queden yá pendientes los trabayos d’esterior. El complexu sistema de canalizaciones internes d’agua y residuos ta yá acabáu pa poder entamar a reciclar nesta rampa los primeros barcos.

Cuando entame a funcionar esti branu, la planta de Xixón sedrá la primer planta de descontaminación de grandes buques d’España.

En DDS Vessels trabayarán hasta 15 persones. Los promotores esperen que les nueves normes d’esmantelamientu de barcos qu’entamen en xineru traigan hasta estos cais buques de toa Europa.