El Principáu da vía llibre a volver fumar na cai y terraces ensin guardar distancia​

Salú propón caltener una ventilación afayadiza nos espacios interiores d'usu públicu

L'usu de mididores de CO2 en chigres, restauranes o ximnasios va dexar de ser obligatorio n'Asturies a partir de mañana, sábadu, xornada na que tamién va poder fumase na vía pública y en terraces d'hostelería ensin necesidá de guardar una distancia interpersonal mínima de dos metros.

Éstes son les principales restricciones que caltenía vixentes el Gobiernu d'Asturies pa faer frente a la pandemia de COVID -19 y qu'agora van quedar ensin efectu al asitiase la comunidá nel nivel baxu d'alerta tres amosase un claru enclín descendente na incidencia del coronavirus.

La decisión foi adoptada na xunta celebrada güei pol Conseyu de Gobiernu del Principáu, qu'alcordó dexar ensin efectu les restricciones vixentes dende'l 4 de marzu, según detalló na rueda de prensa posterior a la xunta del Conseyu de Gobiernu la directora xeneral de Salú Pública, Lidia Clara Rodríguez.